Jetzt reichts, hon i mer gedenkt, und hon ihn zur Rede gstellt. Und es glabbs net wos i do erfohrn hon. Hey Leit, des isch a Job! Der derf mein Müll mitnemmen und kriag dafür a nou gezohlt! I net feig hon mi glei beworbn, ober so an Oschtia von an Ausländer, oaner von dei Sozialschmarozzer hot mer mein Traumjob gstohln!

Nor hon i kheart, dass sie in Süditalien Tomatenklauber suachn für die nächste Ernte. Woasch wia geil? 15 Stunden täglich an der frischen Luft. Braun wersch a, do dersporsch der es Solarium. Und an Unterkunft in an Poppkarton ohne Heisl und Wosser zusommen mit 10 ondere biatn sie a nou on, wos willsch mehr? Do brauchsch koan Wellnessurlaub mehr. Jo klor, ob mir der Großgrundbesitzer donn am Ende meine !drei! Euro Stundenlohn überhaupt auszohlt und in Ausweis wieder zrugg gibb, sell isch net sicher. Ober eppes war olm. Und donn, scheiß der Hund drauf, wieder es gleiche! A so a vermaledeiter Neger isch mer zuvor kemmen und hot mir mein Traumjob gstohln!

Donn hon i mi ba so a geiler Fabrik in der Toskana beworbn. Als Näher! Des isch der Hommer, sog i enk! Wos dei olls als Zuasotzleistung biaten! Des glabbsch net! Des hoaßt men auf seine Ongstelltn schaugn! 12 bis 16 Stunden Ausdauer- und Konzentrationstraining an der Nähmaschine! Do brauchsch koan Fitness Center und koan Meditationskurs mehr. Und tuire Schweigewochen in an Kloster konnsch der a sporn, weil reden derf men do a net. Eingsperrt bisch a, weil aus der Fabrik außi derfsch net. Selbsterfahrung und Überlebenstraining isch also a inbegriffen. Es beschte isch die Unterkunft. So an Ort luxus-downgrading! Weg von den überflüssigen Komoditäten der kranken Konsumgesellschaft. Und modern! Bettsharing! Oder besser gsogg, Prietschnsharing. 5 Leit toaln sich turnusmäßig oane horte ausglatschte Prietsche. Des isch Physiotherapie und Akkupunktur in oan! Hinter an Vorhang in der gleichen Halle wie die Maschinen mit dem Lärm als Mantra fürs Seelenheil. Dazua a gratis Diät nach dem Prinzip FFGN (Friss fast gar nichts). Dass bei dem Service net a nou an Lohn kriagsch isch verständlich. Des wollt i mer net entgian lossn. Ober wia solls a ondersch sein? A so teppatar fleißiger Chinese hot mir mein Traumjob gstohln!!

Also jetzt reichts wirklich! Während mir ins do in die klimatisierten Büros den Orsch aufreißen, um insere Gesellschaft auf Vordermann zu bringen, Moral und Ordnung züchten, derfn dei Oschtia insere Heisln putzen, insere Scheiße wegraumen, steuerfrei insere Oltn betreuen und insere Wohnungen aufraumen. Und nor welln se a nou a Doch übern Kopf? Und an Aufenthaltsgenehmigung? Epper nou politisches Asyl, weil se ba immene dahoam derschossn wordn warn? Jo wo kammeten mir do hin, ha? Dei solln gfälligscht zrugg wo sie her kemmen, sich in die Schlocht gegen die ISIS schmeißen und do entn endlich den Puff aufraumen, den mir in die leschten Jahrhunderte ongrichtet hobn!