LA SOMENZA DEL CACO

Quando ca giero picinin, in autunno me mare dopo magnà la meteva in tola i cachi. A noi tre boci se illuminava el viso da la contentezza, quei fruti dal bel colore caldo, da la pele lissa come el cuo de un putin ne meteva voia de basarli. Non pensè male, i cachi no i se sgagna, i se basa, prima pian po sempre più forte finché la pele la se sbusa e allora se ciuccia prima el sugo e dopo le linguette che se bone tanto, tenere, slipegose e gelatinose, se ciucciava tutto e alla fine restava le foie col picciolo. Mmm che bontà divina. I cachi ne piaseva tanto e anca anc'oi me piase tanto. Ma quel che allora ne piaseva de più l'era el segreto che ogni caco gaveva dentro. In centro gh'era na somenza scura, lissa e dura, no scrigno con un segreto che nefaseva deventare mati. In fameia gavevino un zogo, na gara che ghe zogava anche me pare e me mare. Se sganava la somenza in mezzo con delicatezza schizandola poco alla volta fra i denti finchè la cedeva e la se verzeva a metà par longo poi vardavino in mezzo cossa gh'era. In mezo se trovava el germe, bianco come l'avorio el gaveva la forma de un corteo col manego e la lama oppure la forma de un scugliero quando la lama la giera un fià grossa e larga ma la cossa più rara e difizie da trovare el giera el piron con le ponte e el manego, chi el trovava el giera el più fortunà. Me fradeo che el gaveva un cuo sfrontato la trovava spesso. Ogni tanto me pare el diseva - chi cata el piron ciapa zinque franchi – de rado el diseva diese ma a noialtri boci ne bastava anca zinque, noialtri se basava el caco con n'ansia che non ve digo e se sgagnava la somenza con na delicatezza e na pazienza come se la fosse de cristallo parchè se la se spacava par largo se rompeva el germe a metà e non valeva, te gavevi perso e te gieri el più mona e tuti i te ciapava par el cuo.

Ieri la me sposa la gà portà a ca i cachi, quando li go visti balavo de gioia all'idea de la somenza e de la gara. Dopo zena go dito ai me fioi – chi trova el piron ciapa n'euro – (i tempi i se cabià e bisogna datarse) go spiegà el zogo e semo partii coi basi. Ciuccia, ciuccia ghemo magna tutti i cachi ma de somenze gnanca l'ombra. I fioi i me dise – ma papi qua non c'é il seme – . Giuro che se i me gavesse sparà al cuore saria sta lo stesso. Sti fioi de cagna i ga cavà via le somenze dai cachi.  Digo; ma che fastidio te da la somenza dei cachi, posso capir i mandarini che che de somenze i sè pieni ma i cachi i ghe n'ha na sola. Me domando se gnanca un carabiniere, un magistrato i se ga scorto che i ne ga ciavà le somenze de' cachi e se non gh'è mai pasà par la testa de metterli in galera a sti ladroni delinquenti che oltre a la somenza i ne ga ciavà anche un toco de infanzia.

Voio fare un apeo:

Rimetè subito le somenze ai cachi bruti rospi che non sè altro, ca le rivoluzion se partie anca par de manco.

Zerco anca sostenitori che se semo in tanti i ciapa paura e i rimette subito tutto al so posto e po' ve 'nvito a zogar a casa mia:

n'euro a chi ga el piron.